ಮೊಬೈಲ್ ಇಲ್ಲ… ಸೋಶಿಯಲ್ ಮೀಡಿಯಾ ಇಲ್ಲ… ವಿದ್ಯುತ್ ಇಲ್ಲ… ಮನುಷ್ಯರ ಸಂಪರ್ಕವೂ ಇಲ್ಲ…
ಇಂದಿನ ಕಾಲದಲ್ಲಿ ಕೆಲ ಗಂಟೆಗಳ ಕಾಲ ಫೋನ್ ಇಲ್ಲದೇ ಇರೋದೂ ಕಷ್ಟ. ಆದರೆ ಒಬ್ಬ ವ್ಯಕ್ತಿ 27 ವರ್ಷಗಳ ಕಾಲ ಸಂಪೂರ್ಣವಾಗಿ ಸಮಾಜದಿಂದ ದೂರವಾಗಿ ಕಾಡಿನಲ್ಲೇ ಬದುಕಿದ್ದಾನೆ ಎಂದರೆ ನಂಬೋದು ಕಷ್ಟವೇ ಸರಿ! ಆದರೆ ಇದು ಸಿನಿಮಾ ಕಥೆಯಲ್ಲ. ಅಮೆರಿಕದ Maine ರಾಜ್ಯದ ಕಾಡಿನಲ್ಲಿ ನಡೆದ ನಿಜ ಘಟನೆ. ಜಗತ್ತಿನಾದ್ಯಂತ “Ghost of the Woods” ಮತ್ತು “North Pond Hermit” ಎಂದು ಖ್ಯಾತಿ ಪಡೆದಿದ್ದ ಈ ವ್ಯಕ್ತಿಯ ಹೆಸರು Christopher Thomas Knight.
1986ರಲ್ಲಿ ಕೇವಲ 20 ವರ್ಷದ Christopher Knight ತನ್ನ ಕಾರನ್ನು ತೆಗೆದುಕೊಂಡು ಹೊರಟಿದ್ದ. ಆದರೆ ಅದಾದ ಬಳಿಕ ಆತ ಸಮಾಜಕ್ಕೆ ಮರಳಿ ಬಂದೇ ಇರಲಿಲ್ಲ. ಯಾರೊಂದಿಗೂ ಮಾತಾಡದೆ, ಯಾವುದೇ ವಿದಾಯ ಹೇಳದೆ ಆತ ನೇರವಾಗಿ Maine ರಾಜ್ಯದ ದಟ್ಟ ಕಾಡಿನೊಳಗೆ ಹೋಗಿದ್ದ. ಅಲ್ಲಿಂದ ಆರಂಭವಾಯಿತು ಅವನ ವಿಚಿತ್ರ ಏಕಾಂತ ಜೀವನ.
ಕಾಡಿನೊಳಗಿನ ಗುಪ್ತ ಬದುಕು
ಕಾಡಿನೊಳಗೆ ಸಣ್ಣ ತಾತ್ಕಾಲಿಕ ಶಿಬಿರ ನಿರ್ಮಿಸಿಕೊಂಡಿದ್ದ ಆತ, 27 ವರ್ಷಗಳ ಕಾಲ ಅಲ್ಲಿ ಬದುಕಿದ್ದ. ಚಳಿಗಾಲದ ಮೈನಸ್ ತಾಪಮಾನ, ಮಳೆ, ಹಿಮಪಾತ… ಯಾವುದನ್ನೂ ಲೆಕ್ಕಿಸದೆ ಆತ ಕಾಡಿನಲ್ಲೇ ಉಳಿದಿದ್ದ. ಆದರೆ ಆತ ಸಂಪೂರ್ಣವಾಗಿ ಪ್ರಕೃತಿಯಲ್ಲೇ ಬದುಕುತ್ತಿದ್ದವನಲ್ಲ. ಬದುಕಿಗಾಗಿ ಸುತ್ತಮುತ್ತಲಿನ ಖಾಲಿ ಮನೆಗಳು ಮತ್ತು ಕಾಟೇಜ್ಗಳಿಂದ ಆಹಾರ, ಗ್ಯಾಸ್ ಸಿಲಿಂಡರ್, ಬ್ಯಾಟರಿ, ಬಟ್ಟೆ ಮತ್ತು ಅಗತ್ಯ ವಸ್ತುಗಳನ್ನು ತರುತ್ತಿದ್ದ ಎನ್ನಲಾಗಿದೆ.
ಪೊಲೀಸರಿಗೂ ಸಿಕ್ಕಿರಲಿಲ್ಲ!
ಸ್ಥಳೀಯ ಜನರು ವರ್ಷಗಳ ಕಾಲ ತಮ್ಮ ಮನೆಗಳಲ್ಲಿ ಆಹಾರ ಮತ್ತು ವಸ್ತುಗಳು ನಾಪತ್ತೆಯಾಗುತ್ತಿರುವ ಬಗ್ಗೆ ದೂರು ನೀಡುತ್ತಿದ್ದರು. ಆದರೆ ಕಳ್ಳ ಯಾರು ಎಂಬುದು ಯಾರಿಗೂ ಗೊತ್ತಿರಲಿಲ್ಲ. ಕಾಡಿನೊಳಗೆ ಒಬ್ಬ “ಭೂತದಂತೆ” ಯಾರೋ ವಾಸಿಸುತ್ತಿದ್ದಾರೆ ಎಂಬ ಮಾತು ಹರಡಿತ್ತು. ಅದಕ್ಕೇ ಜನ ಅವನಿಗೆ “Ghost of the Woods” ಎಂದು ಹೆಸರಿಟ್ಟಿದ್ದರು. 2013ರಲ್ಲಿ ಕೊನೆಗೂ ಪೊಲೀಸರು ಅವನನ್ನು ಬಂಧಿಸಿದರು. ಆ ಸಮಯದಲ್ಲಿ ಆತ ಸುಮಾರು ಸಾವಿರಕ್ಕೂ ಹೆಚ್ಚು ಕಳ್ಳತನ ಪ್ರಕರಣಗಳಿಗೆ ಸಂಬಂಧಿಸಿದ್ದಾನೆ ಎಂಬ ಮಾಹಿತಿ ಹೊರಬಂದಿತ್ತು. ಪೊಲೀಸರು ಹಿಡಿದಾಗಲೂ ಆತ ಬಹಳ ಶಾಂತವಾಗಿದ್ದ ಎನ್ನಲಾಗಿದೆ.
ಆತ ಹೀಗೆ ಯಾಕೆ ಬದುಕಿದ?
ಅತ್ಯಂತ ಕುತೂಹಲಕಾರಿ ವಿಷಯ ಇದೇ! Christopher Knight ನಂತರ ಹೇಳಿದ್ದೇನಂದರೆ, ತಾನು ಜನರ ಜೊತೆ ಇರಲು ಇಷ್ಟಪಡುವುದಿಲ್ಲ. ಏಕಾಂತ ಜೀವನವೇ ತನ್ನಿಗೆ ಶಾಂತಿ ನೀಡುತ್ತಿತ್ತು. 27 ವರ್ಷಗಳಲ್ಲಿ ಆತ ಕೆಲವೇ ಪದಗಳನ್ನು ಮಾತನಾಡಿದ್ದಾನೆ ಎಂದು ವರದಿಗಳು ಹೇಳುತ್ತವೆ. ಈ ಘಟನೆ ನಂತರ ಮನುಷ್ಯ ಸಂಪೂರ್ಣ ಒಂಟಿಯಾಗಿ ಬದುಕಬಹುದಾ? ಸಮಾಜದಿಂದ ದೂರವಾದರೆ ಮನಸ್ಸಿಗೆ ಶಾಂತಿ ಸಿಗುತ್ತದೆಯಾ? ಆಧುನಿಕ ಜೀವನ ಜನರನ್ನು ದಣಗಿಸುತ್ತಿದೆಯಾ? ಎಂಬ ಪ್ರಶ್ನೆಗಳು ಜಗತ್ತಿನಾದ್ಯಂತ ಮತ್ತೆ ಮುನ್ನೆಲೆಗೆ ಬಂದವು. ಇಂದಿನ ಡಿಜಿಟಲ್ ಯುಗದಲ್ಲಿ ಜನರಿಂದ ದೂರವಾಗಿ, ಪ್ರಕೃತಿಯ ನಡುವೆ 27 ವರ್ಷ ಬದುಕಿದ Christopher Knightನ ಕಥೆ ಈಗಲೂ ಜಗತ್ತಿನ ಅತ್ಯಂತ ವಿಚಿತ್ರ ಮತ್ತು ಕುತೂಹಲಕಾರಿ ನೈಜ ಘಟನೆಗಳಲ್ಲಿ ಒಂದಾಗಿ ಉಳಿದಿದೆ.
