ಬ್ಯಾಂಕಾಕ್: ಥಾಯ್ಲೆಂಡ್ ಸರ್ಕಾರ ಇದೀಗ ಭಾರತೀಯರಿಗೆ 5 ವರ್ಷದ ವಿಶೇಷ “Destination Thailand Visa” (DTV) ವ್ಯವಸ್ಥೆಯನ್ನು ಪರಿಚಯಿಸಿದ್ದು, ಡಿಜಿಟಲ್ ನೋಮಾಡ್ಸ್, ಫ್ರೀಲಾನ್ಸರ್ಗಳು ಹಾಗೂ ರಿಮೋಟ್ ವರ್ಕ್ ಮಾಡುವವರಿಗೆ ಇದು ಹೊಸ ಅವಕಾಶವಾಗಿ ಪರಿಣಮಿಸಿದೆ.
ಈ ಹೊಸ ವೀಸಾ ವ್ಯವಸ್ಥೆಯಡಿ ಭಾರತೀಯರು ಥಾಯ್ಲೆಂಡ್ನಲ್ಲಿ ದೀರ್ಘಕಾಲ ವಾಸವಿದ್ದು, ಬ್ಯಾಂಕಾಕ್, ಫುಕೆಟ್ ಸೇರಿದಂತೆ ವಿವಿಧ ನಗರಗಳಿಂದಲೇ ತಮ್ಮ ವಿದೇಶಿ ಉದ್ಯೋಗ ಅಥವಾ ಆನ್ಲೈನ್ ಕೆಲಸ ಮುಂದುವರಿಸಬಹುದಾಗಿದೆ.
DTV ವೀಸಾದ ವಿಶೇಷತೆ ಏನು?
ಈ ವೀಸಾ 5 ವರ್ಷಗಳವರೆಗೆ ಮಾನ್ಯತೆ ಹೊಂದಿರುತ್ತದೆ. ಬಹು ಪ್ರವೇಶ (Multiple Entry) ಅವಕಾಶ ನೀಡುತ್ತದೆ. ಪ್ರತಿ ಪ್ರವೇಶಕ್ಕೆ 180 ದಿನಗಳ ವಾಸ ಅವಕಾಶ. ಅಗತ್ಯವಿದ್ದರೆ ವಾಸ ಅವಧಿ ವಿಸ್ತರಣೆ ಸೌಲಭ್ಯ. ರಿಮೋಟ್ ವರ್ಕ್ ಮತ್ತು ಡಿಜಿಟಲ್ ಉದ್ಯೋಗಗಳಿಗೆ ಅನುಕೂಲ ಎಂಬ ಪ್ರಮುಖ ಸೌಲಭ್ಯಗಳನ್ನು ಒಳಗೊಂಡಿದೆ.
ಯಾರಿಗೆ ಹೆಚ್ಚು ಉಪಯೋಗ?
ಈ ವೀಸಾ ಮುಖ್ಯವಾಗಿ IT ಉದ್ಯೋಗಿಗಳು, ಫ್ರೀಲಾನ್ಸರ್ಗಳು, ಯೂಟ್ಯೂಬರ್ಗಳು, ಕಂಟೆಂಟ್ ಕ್ರಿಯೇಟರ್ಗಳು, ಡಿಜಿಟಲ್ ಉದ್ಯಮಿಗಳು, ವಿದೇಶಿ ಕಂಪನಿಗಳಿಗೆ ದೂರದಿಂದ ಕೆಲಸ ಮಾಡುವವರು ಇವರಿಗೆ ಹೆಚ್ಚು ಅನುಕೂಲಕರವಾಗಿದೆ.
ಏಕೆ ಥಾಯ್ಲೆಂಡ್ ಆಯ್ಕೆ?
ಕಡಿಮೆ ಜೀವನ ವೆಚ್ಚ, ವೇಗವಾದ ಇಂಟರ್ನೆಟ್, ಉತ್ತಮ ಪ್ರವಾಸಿ ವಾತಾವರಣ ಹಾಗೂ ದೀರ್ಘಕಾಲ ವಾಸಕ್ಕೆ ಅನುಕೂಲಕರ ವ್ಯವಸ್ಥೆಗಳ ಕಾರಣ ಥಾಯ್ಲೆಂಡ್ ಈಗ ಜಾಗತಿಕ ಡಿಜಿಟಲ್ ವರ್ಕ್ ಹಬ್ ಆಗಿ ಬೆಳೆಯುತ್ತಿದೆ. ವಿಶೇಷವಾಗಿ ಬ್ಯಾಂಕಾಕ್, ಫುಕೆಟ್ ಮತ್ತು ಚಿಯಾಂಗ್ ಮೈ ನಗರಗಳು ರಿಮೋಟ್ ವರ್ಕ್ ಮಾಡುವವರ ಪ್ರಮುಖ ಕೇಂದ್ರಗಳಾಗಿ ರೂಪುಗೊಳ್ಳುತ್ತಿವೆ.
ಭಾರತೀಯರಿಗೆ ಮತ್ತಷ್ಟು ಅನುಕೂಲ
ಇತ್ತೀಚೆಗೆ ಭಾರತೀಯರಿಗೆ ಥಾಯ್ಲೆಂಡ್ನಲ್ಲಿ ವೀಸಾ-ಫ್ರೀ ಪ್ರವೇಶ ಸೌಲಭ್ಯ ನೀಡಲಾಗಿತ್ತು. ಇದೀಗ ದೀರ್ಘಕಾಲ ವಾಸ ಹಾಗೂ ಉದ್ಯೋಗ ಅವಕಾಶಗಳಿಗೆ DTV ವೀಸಾ ಹೊಸ ಆಯ್ಕೆಯಾಗಿ ಹೊರಹೊಮ್ಮಿದೆ. ಕೋವಿಡ್ ನಂತರ “Work From Anywhere” ಮಾದರಿ ವೇಗವಾಗಿ ಬೆಳೆಯುತ್ತಿದ್ದು, ಹಲವು ದೇಶಗಳು ಡಿಜಿಟಲ್ ನೋಮಾಡ್ಸ್ರನ್ನು ಆಕರ್ಷಿಸಲು ವಿಶೇಷ ವೀಸಾ ಯೋಜನೆಗಳನ್ನು ಜಾರಿಗೆ ತರುತ್ತಿವೆ. ಆ ಸಾಲಿನಲ್ಲಿ ಥಾಯ್ಲೆಂಡ್ ಕೂಡ ದೀರ್ಘಕಾಲ ವಾಸ ಹಾಗೂ ರಿಮೋಟ್ ಉದ್ಯೋಗಕ್ಕೆ ಅನುಕೂಲ ಕಲ್ಪಿಸುವ ಮೂಲಕ ಜಾಗತಿಕ ಮಟ್ಟದಲ್ಲಿ ಗಮನ ಸೆಳೆಯುತ್ತಿದೆ.
